Молитвы ко святому Архангелу Михаилу

(Читать желательно по понедельникам)

Святый и великий Архангеле Божий Михаиле, неисповедимыя и пресущественныя Троицы первый во Ангелех предстоятелю, рода же человеческаго приставниче и хранителю, сокрушивый с воинствы своими главу прегордаго Денницы на небеси посрамляяй выну злобу и коварство его на земли! К тебе прибегаем с верою и тебе молимся с любовию: буди щит несокрушим и забрало твердо Святей Церкви и Православному Отечествию нашему, ограждая их молниеносным мечем твоим от всех враг, видимых и невидимых, не остави же, о Архангеле Божий, помощию и заступлением твоим и нас, прославляющих днесь святое имя твое; се бо, аще и многогрешнии есмы, обаче не хощем в беззакониих наших погибнути. Но еже обратитися ко Господу и оживленным быти от него на дела благая. Озари убо ум наш светом лица Божия, иже выну сияет на молниевиднем челе твоем, да возможем разумети, что есть воля Божия о нас благая и совершенная, и ведети вся, яже подобает нам творити и яже презирати и оставляти. Укрепи благодатию Господнею слабую волю и немощное произволение наше, да, утвердившеся в законе Господнем, престанем прочее влаятися земными помыслы и похотении плоти, увлекающеся, по подобию несмысленных детей, скорогибнущими красотами мира сего, яко ради тленнаго и земнаго безумне забывати вечная и небесная. Над всеми же сими испроси нам Свыше дух истиннаго покаяния, нелицемерную печаль по Бозе и сокрушение о гресех наших, да остающее нам число дний временнаго живота нашего иждивем не во угождении чувств и работе страстем нашим, но во изглаждении зол содеянных, слезами веры и сокрушения сердечнаго, подвигами чистоты и святыми делами милосердия. Егда же приблизится час нашего, освобождения от уз бреннаго сего телесе, не остави нас, Архангеле Божий, беззащитных противу духов злобы поднебесных, обыкших преграждати душе человечестей восход в горняя, да, охраняеми тобою, безпреткновенне достигнем оных преславных селений райских, идеже несть печаль, ни воздыхание, но жизнь бесконечная, и, сподобльшеся узрети пресветлое лице Всеблагаго Господа и Владыки нашего, падше со слезами у ног Его, в радости и умилении воскликнем: слава Тебе, дражайший искупителю наш, иже за премногую любовь Твою к нам, недостойным, блоговолил еси послати Ангелы Твоя в служение спасению нашему! Аминь.

Особенная молитва Архангелу Михаилу.

Аще который человек прочтет сию молитву, того дня не прикоснется к нему ни диавол, ни зол человек, ни лестию соблазнится сердце его. Аще ли преставится от жития сего, то и ад душу его не примет.

О, Господи Боже, Великий Царю Безначальный, пошли, Господи, Архангела Твоего Михаила на помощь рабам Твоим (имена) изъяти нас от враг наших видимых и невидимых!
О, Господень Архангеле Михаиле, демонов сокрушителю, запрети всем врагам, борющимся с нами, сотвори их яко овцы и сокруши их яко прах пред лицем ветра.О, Господень великий Михаиле Архангеле Архистратиже, шестокрылатый первый Княже и Воеводо Небесных Сил – Херувим и Серафим, буди нам помощь во всём: в обидах, в скорбях, в печалях, в пустынях, на распутьях, на реках и на морях тихое пристанище! Избави нас, великий Михаиле Архангеле, от всякия прелестей диавольския, егда услышиши нас, грешных рабов своих (имена) молящихся Тебе и призывающих имя твое Святое, ускори на помощь нашу и услыши молитву нашу.
О, великий Архангеле Михаиле! Победи вся противящееся нам силою Честнаго и Животворящего Небеснаго Креста Господня, молитвами Пресвятыя Богородицы, святых Ангелов, святых апостол, святаго пророка Божия Илии, святаго великого Николая Архиепископа Мир Ликийских Чудотворца, святаго Андрея Юродивого, святых великомучеников Никиты и Евстафия, преподобных отец и святых святителей и мучеников и всех Святых Небесных Сил.
О, великий Архангеле Михаиле! Помози нам, грешным рабам Твоим (имена), избави нас от труса, потопа, от огня и меча, от напрасныя смерти, от всякаго зла и от врага льстивого и от бури наносимыя и от лукаваго избави нас, Великий Михаиле Архангеле Господень, всегда и ныне и присно и во веки веков. Аминь.